വെളിച്ചത്തിന്റെ വഴിയേ പോകണമത്രേ...

മുടിനീട്ടിയതു കൊണ്ട്..

 ഇരുട്ട് കണ്ടാൽ വഴിമാറണമത്രെ..

എടീ എന്ന്  നീ വിളിച്ച പഴക്കം കൊണ്ട്..

കൂട്ടിനകത്ത് പെറ്റു പെരുകിക്കണമത്രേ

നിനക്കെന്നെ തീറെഴുതി തന്നത് കൊണ്ട്...

വാക്കുകളിൽ ചിന്തകളുടെ വിഷം പുരട്ടരുതെന്നും

സ്വപ്നങ്ങൾക്ക് ചിറകു മുളപ്പിക്കരുതെന്നും പറയുന്നത്

നിന്റെ നിയമ പുസ്തകത്തിലെ 

വിശുദ്ധ വാക്യങ്ങൾ കൊണ്ട്..   

ഇനിയേതു ശസ്ത്രക്രിയ  കൊണ്ടാണ്..

ഏതു പുനർജ്ജനിയിൽ മുങ്ങിയാലാണ്

ഈ പടം പൊഴിച്ചെനിക്കുമൊരു

നിയമ പുസ്തകത്തിന്റെ 

യജമാനനാകാൻ കഴിയുക..???